Sè vo passate per u paese di Ghisoni, vidarete un monte maestosu chì supraneghja u locu. U so nome, Kyrie Eleison. Vene da i tempi landani. À u quattordicèsimu sèculu, hè accaduta in Corsica un’eresia chjamata di I Ghjuvannali.
Cum’è i franciscani, e ghjente di sta cumunità campàvanu pòvari. D’altronde, criticàvanu a Ghjesgia è l’òrdine suciale di u so tempu. L’Inquisizione, ghjunta da Roma, i cundannò à morte. Da u cuventu d’Alisgiani à a pieve di Càrbini, tutti funu perseguitati è tombi. L’ùltimi s’èranu rifugiati in Ghisoni. Ma l’anu trovi l’incaricati di l’Inquisizione è l’anu brusgiati.
Tandu, avìanu difesu à i paisani di rèndeli un omagiu cristianu, à quell’erètichi. Ma quandu l’omi di Roma èbbenu accesu un gran’focu, Ghisunesi s’èranu messi à cantà è à pregà. È à e prime parolle di u « Kyrie Eleison », un cantu di u cumunu di a messe chì chere pardonu à u Signore, pigliò à vulà, isciuta da u fucarone, una culumba chì si n’andò versu a prima cima sopra à paese, chì si chjama, dapoi tandu, u Kyrie Eleison.
È quandu anu cantatu i paisani a segonda strofa, (Christe Eleison), un antra culomba si ne vulò versu à a cima vicina, chì si chjama, di listessu modu dapoi tandu, u Christe Eleison.