Hè un locu 100% cursòfunu induve vo pudete stà à sente, dumandà rinsignamenti o cunsigli è soprattuttu mèttevi à parlà corsu à u vostru rìtimu.

PER SCOPRE
Ghjè a to prima annata à Praticalingua. Scopri propiu u corsu. Veni à studià è scruticà a lingua corsa. T’avemu da aiutà à sbrugliatti per chè tù possi parlà abbastanza in furia. L’attelli di lingua corsa anu per scopu di purtatti à una pratica cutidiana semplice è ùtule.

PER PRATICÀ
Sè t’ùn sì micca siguru di tè, sè tù sì intravatu o bluccatu in a to pratica, a suluzione ùn hè di seguità corsi di lingua ma di fà, in immersione, altra cosa chè u studiu schjettu di u corsu. Veni è scriviti in un attellu immersivu, amparerai un’arte è parlerai. O veni solu à amparà o praticà un attività chì t’interessa, cù u piacè di falla in corsu.

PER TRAMANDÀ
U to impegnu hè preziosu : affaccati à l’occasione ind’è noi. Participerai à fà campà u spaziu assuciativu nunda chì venendu à sparte un caffè ogni tantu. Guarantisce à quelli chì amparanu un bagnu immersivu riccu è diversu hè una manera diu tramandà a lingua è d’impegnatti cun noi.