U 22 d’aprile di u 1992, ci hè, in Furiani, un quartu di finale di Cuppa di Francia trà u Sporting Club di Bastia è Nancy. Dopu à i calci di rigore è trè cacciate tremende di Bruno Valencony, u SCB si qualificheghja per a meza finale di a Cuppa.
A gioia di i Corsi cuntinueghja u lindumane, quandu annùnzianu à a televisiò chì u scontru si ferà in Armand Cesari, contru à Marseglia, una trà e più bone sguatre Eurupèe di tandu, cù Papin, Boli, Waddle !
I dirigenti, puru, sò inchieti. U stadiu ùn pò micca accoglie è risponde à a forte furtìssima dumanda di piazze. Ùn ci sò chè 12000 piazze dispunibule, ci ne vuleria u doppiu o u trìplice !
Decìdenu di demulisce a tribuna Claude Papi, cù l’aiutu di a sucetà Vendasi. U 25 d’Aprile, si face l’operata senza cumunicazione è senza permessu.
Dopu, ci vole à custruisce una nova tribuna pruvisoria di 10000 piazze. Cuntattata, a sucetà Space Location dice chì ùn hè micca pussìbule in una simana sola.
Sud tribune piglierà u mercatu, per 1 000 000 di franchi.
Durante trè ghjorni, ci sò parechji scontri trà dirigenti, a Lega Corsa di Ballò, i servizii di a Prefettura di Cismonte è Sud Tribune.
U prucessu in ghjustizia paliserà chì falsi prucessi verbali seranu scritti è, in fine, si decide di vende e piazze.
I sustenidori sò propiu scuncertati quand’elli vèdenu i prezzi di cinque centu franchi ! Ma u luni 4 di maghju, filmi di a nova tribuna, arrimbata è edificata nant’à cugnulette di legnu circulèghjanu è e piazze ùn sò micca tutte vendute. L’ùltime sò date di rigalu in i licei.
U marti u 5 di maghju , hè u ghjornu di u scontru. Mentre chè i sustenidori ghjùnghjenu, a cunstruzzione di a tribuna pruvisoria ùn hè micca finita. L’ùltima reunione di a securità si face senza u Prefettu, andatu à accoglie à Bernard Tapie in Puretta.
À 7 ore di sera, i sustenidori sò guasi tutti in piazza. Nantu à tribuna nordu, certi giurnalisti spurtivi facenu parte à l’auditori ch’elli anu a sensazione d’esse « nantu à un battellu ».
À 8 ore di sera, i ghjucadori èntrenu nantu à u terrenu. In issu mentre, sottu à a tribuna, tècnichi sò sempre à stringhje vite è bullò !
À 8 è un quartu, a tribuna move. U speaker dumanda à i sustenidori d’ùn micca pichjà di pedi in terra.
À 8 è vinti minuti, una parte di a tribuna trafala. Un rimore sordu, u silenziu è i mughji.
Ma sùbitu, tuttu mundu aiuta.
I ghjucadori àprenu e chjudende di a tribuna cum’elli ponu, da chì i spettadori pòssanu evacuà a tribuna è falàssine nantu à u campu di ghjocu.
U terrenu diventa un ospidale è i pumpieri ghjùnghjenu da tutte e bande.
A televisò filma in diretta è a ghjente si mette davanti à a camera per dì « tuttu và bè per mè » à i parenti è amichi firmati in casa. Hè chì, tandu, telefunini ùn ci n’era ! Era u solu mezu per rassigurà a so ghjente.
Ospidali corsi sò carchi è, certi feriti vanu in Marseglia.
À mezanotte, sò annunziati 8 morti.
U lindumane, ognunu dinnunzia stu scàndalu.
A pulèmica cresce ogni ghjornu dopu à a catastrofa è l’inchiesta mostra chè u scontru, ùn ci vulìa micca ch’ellu fussi ghjucatu in ste cusì pèssime cundizione di securità.
Solu qualchì rispunsèvule serà cundannatu, dopu à parechji anni.
U bilanciu hè terrìbule : 18 morti, 2357 feriti, vite è famiglie sbrembate da l’affarìsimu di u ballò.