1-13

In u 1816, durante a Resturazione di a Munarchia francese, hè statu un episodiu pocu cunnisciutu di a storia nustrale ma puru assai gloriosu : a Guerra di u Fiumorbu (o « Vittoria di Fiumorbu ») è di u Cumandante Poli.

À principiu di tuttu ci fù a vuluntà di u Marchese de Rivière, Guvernatore Francese di a Corsica, di ripiglià u tesoru di Murat, Maresciale di l’Imperu, Rè di Nàpuli è sempre fidu à Napuleone. U tesoru, una cascia di diamanti, fù cunfidatu da Murat à un cumandante Corsu, Bernardu Poli. Quellu, ricusendu di dallu à u Marchese, s’era rifugiatu in u so locu, u paese di Serra di Fiumorbu. Custì, ci pisò una vera armata di paisani, omi è donne.

Parechje culonne francese, più di 8000 suldati, funu mandate per sottumette u rughjone è ricuperà u tesoru, cù, à u so capu, u Marchese de Rivière.

Funu stati piantati i Francesi da Fiumurbacci, chì lamponu tamanti pentoni da e creste. Tant’è tanti suldati funu culpiti è u Marchese anch’ellu l’avìa corsa brutta : ritirèndusi, avia francatu u fiume coltu nant’à e spalle di u so dumèsticu chì fù ferritu à so tornu, lampendu, à tempu à ellu, u Marchese in l’acqua.

Furiosu, u Rè di Francia mandò de Rivière in un postu d’Ambasciadore in Custantinòpuli, è numinò un novu Amministratore in Còrsica. Quellu, forse più astutu chè u so predecessore, prupone à Poli, una « Pace di i bravi », cù un’annistìa per ellu è tutti i soi.

Ghjera l’ultimu episodiu di e Rivoluzioni di Còrsica chì si sò compie, ci vole à ramentàssila dunque, cù una disfatta di e truppe francese.