U 30 di nuvembre di u 1789, à a dumanda di u Diputatu Saliceti, l’Assemblea Naziunale vota una lege chì dice chì i Corsi saranu sott’à a listessa lege chì l’altri Francesi in una nova custituzione.
In lu 1790, sò annistiati Paoli è i so amichi. Vultendu d’Inghilterra, hè ricevutu in Parigi da Luigi u Sedicèsimu, è dichjara chì per ellu, cù stu novu regime di a Francia, u so pòpulu hè lìberu.
Ghjuntu in Còrsica, Paoli hè elettu Presidente di u Direttoriu Dipartimentale è Cumandante di a Guarda Naziunale.
Ma u Babbu di a Pàtria, chì hè statu alluntanatu più di vint’anni da a Còrsica, ùn cunosce forse più abbastanza bè e forze pulìtiche isulane.
À u principiu di u so ritornu, si puderebbe dì chì Paoli hè appena pigliatu in manu da i capimachja Republicani isulani, chì ci si trova Arena, Saliceti è i Bonaparte.
Ma, strada facendu, si sfida è s’alluntaneghja da sta ghjente. Elli cèrcanu a indebulillu à l’ochji di i dirigenti Parigini, chì avà u vèdenu cum’è un falsu rivoluziunariu ch’un hà micca accettatu a cundanna à morte di u Rè.
U 26 di maghju di u 1793, una Cunsulta, addunita in Corti, piglia a decisione d’ùn piu ricunnocse i cummissarii è i diputati Republicani.
U 17 di lugliu, in Parigi, a Cuvenzione mette à Paoli for’di lege.
Dopu à quasi un annu di lotta, aiutati di i bastimenti inglesi di Nelson, i Paulisti pìglianu a suprana nant’à i Francesi.
In u mese di ghjungnu di u 1794, un’altra cunsulta pruclameghja a nàscita di u Reame Anglo-Corsu. U Rè d’Inghilterra diventa Rè di Còrsica, ma a lege hè fatta da un parlamentu isulanu.
Hè numinatu un Vicirè, Sir Eliott, chì pocu à pocu si sfida di Paoli è dumanda ch’ellu fussi richjamatu in Inghilterra. Hè cusì ch’ellu si ne volta in Londra, induve s’hà da spenghje in lu 1807.
In tantu, in Còrsica, davant’à e vittorie francese di u Generale Bonaparte in Italia, Sir Eliott riceve u cummandu d’abbandunà l’ìsula in u 1796.
Pocu tempu dopu, suldati Francesi di l’armata d’Italia sò mandati à ripglianne u pusessu.