Scientificu Grecu
Clàudiu Tulemeu hè campatu durante u primu sèculu dopu à Cristu, in Alessandria in Egittu. Omu di scienza, fù astrònomu, astròlogu, matemàticu è geògrafu. A so geografìa è una sìntesi di tutte e cunniscenze geogràfiche di u mondu anticu. Face a descrizzione di u mondu cunnisciutu à l’epica di l’Imperatore rumanu Adrianu.
È di siguru, ci hè una descrizzione di a Còrsica bella detagliata è precisa in u capitulu chjamatu « Situazione di l’isola di Cyrnos ». L’opera hè a sola vistica cunnisciuta di nomi di i lochi, di e cità è di i pòpuli di a Còrsica antica.
Segondu ellu, ci èranu 2 culunìe, 24 cità (10 di u liturale è 14 di l’internu), quattru porti è una duzina di pòpuli spapersi per l’ìsula sana.
E culunìe mintuvate sò e culunìe rumane di Mariana è d’Aleria. I porti i più impurtanti sò u Portu Syracus chì puderìa esse Portivechju è Palla, portu di piraterìa, chì sarìa Bonifaziu.
Di i pòpuli, o piuttostu tribù, si pò numinà i Cervinini di Balagna, i Vanacini di Capicorsu, i Licninoi di Niolu, i Sybri di u centru è i Tarabenoi di u Taravu… Trà e numerose cità, o paesi, pudemu parlà di Ficaria (Fìcari), Venicium (Vènacu), Albiana versu Monte Biancu o Keneston versu Ghisoni.
Sè a parte maiò di i nomi dati da Tulemeu hè smarrita o ferma misteriosa, ‘ssa geugrafìa hè trà quelli testimoni cusì scarsi di a ricchezza di l’antichità Corsa, è forse di i tempi più anziani.